حُـزن حمد السعيد على طيره

شاعرنا حمد السعيد لم يعثر على طيره وحزن كثيراً لفقدانه وكان كل مايتمناه هو أن يكون

ذلك الطير في حالة طيبة وغير جائع ولم يؤثرفيه البرد فانتشرت قصيدة الطلح انتشارا

واسعا وسمع بها الجميع ومن ضمنهم سمو الامير عبد العزيز بن سعود((السامر)) وهو

من عشاق القنص ومن عشاق طيور الحرار فأحس بمعاناة حمد السعيد وحزنه العميق

وهو يناجي شجرة الطلح وينشدها عن طيره فأهدى سموه للشاعر حمد السعيد طيرا

من أطيب طيوره عوضا عن ما فقده فكان لابد ان يسجل هذا الموقف لسمو الامير

عبد العزيز بن سعود فكانت هذه الابيات التي كتبها الشاعر حمد السعيد وهو يصف

طيب سمو الامير عبد العزيز بن سعود مع وصفا دقيقا للصقر


حيث يقول


يالبازعي طيري طلع مثل راعيه زولٍ وفعـلٍ والمـواري تشابـه

بالطلع موقف ما لقي من يماريـه عساه يسلم سيـدي يـوم جابـه

له ماكرٍ في بر فارس محاريـه كني اشوفه يوم خاطـوا قطابـه

صفاة وجهه مع شـدوده توديـه ضمن الحرار ولا وراها طلابـه

النادر اللي يوم عزمـت اسميـه سميته السامر واشوفـه زهابـه

ليـا قفيتـه شفـت دقٍ محنيـه وليا نطحته مـن عيونـه تهابـه

كن الثريا في قواطـي مواميـه ابيض نحر كنه يشع الضوا بـه

هجرٍ قصيرالساق جبـره ثناديـه وله عاتقٍ يعطي شموخ ومهابـه

ليا مسح وجهه ونهض معاليـه يطري علي اللي عزيـزٍ جنابـه

به من طبوعه مشبع اللي حواليه وماخذ من طبوعه ليان بصلابـه

وجهه ليامن صاد يشبه محاليـه لا بشر بضيفٍ وردد هـلا بـه

لا تل سبقه قلت يـا طيـر لبيـه واقفى وكني كاسبٍ بـه ثوابـه

وجاهن وهو كن المنايـا تباريـه زيزوم قـوم وفزعـوه القرابـه

اللي معه بالطلع ما عـاد يمديـه ياصل مطاليعه وهو ما درى بـه

من عادته برق الدواغر مداميـه في صيدته الطير غمقٍ صوابـه

ليا ضرب ما وافق الضرب يفريه كن بيمينه من سيوف الصحابـه

ينقى كبير العرف ما هو يخليـه من خيشة قدمـه نهبهـا نهابـه

يا سعد عين اللي قنص عانيٍ فيه طيرٍ وماخذ من طبـوع الذيابـه

لا صارت الدعوى عناد ومشاريه إخذه وكنك ماخـذٍ معـك لابـه

الطير احبه حيل من حب راعيه عبد العزيز اللي عزيـزٍ جنابـه