ترش الماء وصاحبك ضامي

ذعاذيـع الشمـال بعـز ليـلـي هــزت الشـبـاك
تبـي تطـرد هواجيـس الغيـاب وتقطـع أحـلامـي

برد صدري وأنا " أشهق " من لقاك و " أزفر " بفرقاك
ترى ما أقسى من غياب الحبايـب .. غيـر أوهامـي

نبت بأرض السنين المجدبة حبك .. وصـرت أهـواك
رضيـت أعيـش بآجمـل ذكرياتـك باقـي أيـامـي

حبيبي لو لقيت اللـي تبـي مـن هالحيـاة .. هنـاك
أنـا باقـي ( هنـا ) ليـن الليالـي تزهـق آلامــي

على بابك وقفت أمـس أبتسـم لـك كنـي أترجـاك
تعيـد اللـي سرقتـه مـن هنـاي إن كنـت قدامـي

مشينـا مـن زمـان .. وقـدر الله ينتهـي ممشـاك
على درب الغياب .. وخطوتك أسـرع مـن أقدامـي

تجاهلت الوداع .. وقلت لك : ياصاحبي وش جاك ؟!
ترش الماء على رمضى الطريق .. وصاحبك ضامي !!

حنين اللي نقش إسمك علـى صـدري وخـلا شفـاك
تهجـا مـا يـدور بداخلـي مـن جرحـي الـدامـي

جمعني بالورق قصة وفاء .. عاشـت علـى ذكـراك
طمست إسمك من أوراق القصيد .. وصرت بإبهامي !

أنا الوافي علـى كثـر الذنـوب اللـي تبـي أنسـاك
تحزمـت الـوداع .. وشلـت لـك تذكـار بحزامـي

فمـان الله .. رح فـج الغـيـاب ولــوح بيمـنـاك
أبرسـم صورتـك فـي داخلـي وأحييـك بإلهامـي

جمعنا ماضـي الحـب الحقيقـي يـا عسـاي أفـداك
أبيـك تطمـن رمـوش السهـر وتقـولـه نـامـي

فزع بعض القصيـد بهاجسـي مـن هـزت الشبـاك
كتبت آخـر تفاصيـل اللقـا .. وإنقطعـت أحلامـي