يا صدمتي من الاصحاب / للشاعر فضل النظاري

ياصدمتي في أكثر احبابي..وياخيبة ظنوني

ياضيق صدري..لاذكرت انّي عليهم ما كذبت

ياطعنةٍ خلّتني انسى من سبايبها..طعوني

ياجرح ماله طبّ..حتى لو أقول:اليوم طبت

البارحه..والله يكون بعون احاسيسي..وعوني

أحاول اهرب من عمايلهم ولكن ماهربت

ماكنت احسَ انّي أنا أنا..وهذا الكون كوني

أمُرَ في حالة ضياع..وشبه غيبوبه..وكبت

أحباب..أي أحباب ذول اللي على موتي خذوني

الظاهر اني شبت..ياعالم..وانا مابعد شبت

سألت نفسي:هُم يبوني صدق وإلا..مايبوني؟

أجبت نفسي وليتني على سؤالي ما أجبت

اللي لهم مُدّه وهُم في داخلي..واستغفلوني

ياما استغلّوا طيبتي معهم وكل اللي وهبت

وهبتهم قلبي..وشعري..وكل ماحولي..ودوني

تعبت معهم بس ماكنّي رغم هذا..تعبت

شعرت فعلاً بالعذاب..وغصّة الدمع بعيوني

قرّبتهم منّي..وانا اللي كنت احسبنّي قربت

عشانهم قررت ابيع اللي من العالم..شروني

عشانهم بطلت لعب..وليتني والله لعبت

مادامهم ما قدّروا صدقي..ومعهم جرجروني

لو ادري آخرها كذا..من أوّل الدرب انسحبت

أحبابهم واجد..ولا ادري ليه بالذات اخدعوني؟

مع انّ عمري ماخدعت انسان أوحتى قبلت

يا قوّها صدمه..وانا لون الغدر ماهوب لوني

وربّي ما أنلام لو بعد الذي سوّوه..غبت

ما كنت ناقص صدمه اخرى في حياتي..واصدموني

مصدوم خِـلقه..لين مات الحب فيني وانعطبت

الحين مدري كيف اعاملهم..وهُم ما قدروني

ما استوعبوا للّي كتبت من الجروح..وما كتبت

الله يجازيهم على استنزافيَ..وحرقة جفوني

ما كنت حاسبٍ يبيعون الغلا..يومي حسبت

اثر الغلط مني لأني كنت معطيهم جنوني

لكنّي أعلنها صريحٍ تبت والله..ثم تبت

ما عاد لي رغبه أجدَد في علاقتهم طعوني

خسرت في هذا الطريق اضعاف ضعف اللي كسبت

أحسن لي ابعد واشتري نفسي ولا خيبة ظنوني

إن طبت من جرحي..وإلاّ..جِـعلني ما يوم طبت